سعيد ود مهلة بت الرهيم
كان زولا في الحلة نضيييييييييف
وعفيييييييييييييييف
وشفييييييييييييييف
كان من قام معطون في حوض
اما بخمج حوض المونة للطيانة
او بناول الاسطي المونة
وشغلو عتالة
لا يوم ميلادو كان بي ضجة
لا بسماية زي ما ولدوا اولاد العمدة
او اولا السيدة
وكان ميلادوا نزيف في نزيف
من قام زول واجب
كل بيوت الحلة تعرفوا
انو في عيشتو محارب
وما بتاأخر تب لي واجب
في بكيات الحلة تشوفوا
في اعراسها نشوفو
حت في طهور اولادنا نشوفو
شغال بي ضراعو
وده العندوا ضراعوا
لا عندوا مخازن عيش مردومة
لاقروش في خزن ملمومة
لا ميراث من امو
عندو ضراعو
لكن وين ما احتجت ضراعو بجيك
متين ما صحت :سعيييييييد
بي همة بجيك
متين ما صاحت مرا الحلة
يا ابو مرووووووووووة
بتلقي سعيد ود مهلة حداها
وكان انسان
وكان فنان
لما في يوم مزاجو يروق
بديك نمات
نمات حلوات
وصوت زي نسمة برد الروح
بديك نمات
اصلو فقير في صمت
وما عندوا الا ضراعو
وكم نمات حلوات
ان جيتو
او لاقيتو في ساعة راحة
وكل حياتو شقاوة
لكن انسان
كنا نشوفوا
في حوض الطين
زي الطين لكن فيهو روح
زي النيل لكن مجروح
مجروح في رزقوا
لكن مستور
كنا نشوفو
ساعة بناول الاسطي الطوب
وساعة بخمج حوض الطين
وساحة بنزل لوري العيش لي تاجر
وبقول يا ساااااتر...
......
زي الطيييييييييييييين
والطين في الحلة فيهو الروح
الطين في الحلة هو الانسان
وسعيد ود مهلة انسان في طين
انسان في انسان
وزول فنان لو يوم في شغلو لقالو مهلة
مع انو سعيد ود مهلة
لكن مهلتو صعيبة
وفي يوم
....زي ميلادو
.....
سمعنا مماتو
لا سكليبا زائد
من جداتو
لا عماتو
لا ناس الحلة الكان هو ضراعوا
اصلو سعيد ود مهلة عندو ضراعو
عندو ضراعو ومات
وحتي بكانا بقي محدود وموجه
نبكي المال
الجاه
الشنة ورنة
الزول وبضاعتو
الزول وبضاعتو
ناس ضرعاتو بكاهم قل
الحلة اظن داخلاها مضلة
سعيد مفروض
نبكي ضراعو
ونبكي غناهو
ونمات زي نسمة تجينا مطلة
نبكي الروح المرقت من ضرعات الحلة
نبكي الروح المرقت من شبان الحلة
وسعيد روحو موزعة بين اماتو
وبين عماتو
وبين ناسا تصرخ ليل المطرة ....:
ياااااااااااااااااا ابو مروة
نوم بي عافية يجيك الطل
نوم بي مهلة يظلك ظل من الله
نوم بي مهلة
سعيد ود مهلة
ويحرسك نور من الله